რა სურს Gen Z-ს? ქართველი Gen Z-ის ანატომია

ყველა სააგენტოს თანამშრომელი დამეთანხმება, რომ ერთ-ერთი ყველაზე ხშირი მოთხოვნა, რასაც დამკვეთისგან ვისმენთ, არის: "Gen Z" კომუნიკაცია მინდა! მაგრამ რას ნიშნავს ზუსტად Gen Z კომუნიკაცია? როგორ აღიქვამენ ბიზნესები ამ კომუნიკაციას და როგორ აღიქვამს Gen Z მათზე მორგებულ კომუნიკაციას?

ძალიან ხშირად ბიზნესები სტერეოტიპულად უდგებიან Gen Z-ს. საზოგადოების ფართო მასებში ჯენ ზი წარმოდგენილია როგორც ახალგაზრდა, მუდმივად ყურსასმენებითა და სმარტფონით ხელში. თუმცა Gen Z არ არის მხოლოდ 15 წლის მოზარდი, რომელიც სმარტფონს ვერ შორდება; ჯენ ზია ასევე რომელიმე დიდი კომპანიის 28 წლის ბრენდმენეჯერი, რომელიც კარიერულ ამბიციებს ზრდასრული ადამიანის პასუხისმგებლობებს უთავსებს. ბიზნესისა და მარკეტერების უდიდესი შეცდომაა Gen Z-ის ერთ დიდ ერთგვაროვან ჯგუფად მიჩნევა, როდესაც სინამდვილეში ისინი მკაფიოდ იყოფიან მიკროთაობებად, სადაც თითოეულს თავისი უნიკალური მახასიათებლები, პრეფერენციები და კომუნიკაციის სტილი აქვს.

რას ვაკეთებთ სწორად და რას არასწორად? როგორ ფიქრობს ქართველი Gen Z, რა მოთხოვნები აქვთ ბრენდებისგან და რას სთავაზობენ მათ ბრენდები? ამ კითხვებზე პასუხებს წლებია აქტიურად ვეძებ. წლიდან წლამდე ტენდენციები იცვლება, თუმცა ძირითადი მიგნებები უცვლელი რჩება. ამ სტატიის წერა როდესაც დავიწყე, ისევ ძველ გამოცდილებებს რომ არ დავყრდნობოდი, მცირე ონლაინმოკვლევა ჩავატარე, სადაც მონაწილეობდა 150-მდე რესპონდენტი საქართველოს მასშტაბით. კვლევის მიზანი იყო, თუ როგორ დავამყაროთ ეფექტური კომუნიკაცია ჯენ ზი თაობასთან, რა აღიზიანებთ და რა არის მათთვის მნიშვნელოვანი.

კვლევის მეთოდოლოგია:

მოცემული ანალიზი ეფუძნება 2025 წლის ივნისში საქართველოში ჩატარებულ ონლაინგამოკითხვას. კვლევაში მონაწილეობდა Gen Z-ის 150-მდე წარმომადგენელი სხვადასხვა ასაკობრივი ჯგუფიდან (12-დან 28 წლამდე). რესპონდენტთა უმრავლესობა ცხოვრობს თბილისსა და აღმოსავლეთ საქართველოში, რაც Gen Z-ის, როგორც მომხმარებლის ქცევის, ღრმა გაგების საშუალებას იძლევა. იმის მიუხედავად, რომ მიღებული მიგნებები (ინსაითები), სრულად არ მოიცავს საქართველოს ყველა რეგიონს, ვფიქრობ, ანალიზისა და დაფიქრებისთვის კარგ საფუძველს იძლევა.

Gen Z-ის დეკონსტრუქცია: მიკროთაობები და მათი ნიუანსები

გლობალურად, Gen Z, (1997-დან 2012 წლამდე დაბადებული ადამიანები), ხასიათდება ციფრული სამყაროს თანდაყოლილი ცოდნით. ისინი პირველი თაობაა, რომელიც გაიზარდა ინტერნეტთან, სოციალურ მედიასსა და მობილურ ტექნოლოგიებთან ერთად. ციფრული ტექნოლოგიები მათი ყოველდღიური ცხოვრების განუყოფელი ნაწილია. ციფრულობის "მშობლიურობამ" ჯენზის ჩამოუყალიბა სპეციფიკური მოხმარების ჩვევები, მოლოდინები ბრენდებისგან და მათთვის მისაღები და სასურველი კომუნიკაციის მეთოდები.

Gen Z-სთან ეფექტური კომუნიკაციის დასამყარებლად ერთიანი მიდგომა საკმარისი არაა, თითოეულ "მიკროთაობას" საკუთარი მკაფიო პრეფერენციები გააჩნია. ჩვენი კვლევიდან დაიდენტიფიცირებულ ინსაითებს ქვემოთ განვიხილავთ:

ადრეული თინეიჯერები (12-15): ტრენდების მაძიებლები

ეს სეგმენტი სკოლის მოსწავლეებისგან შედგება, მათი ქცევები დიდწილად თანხვედრაშია მათი ასაკის ჯენ ზის გლობალურ ინსაითებთან. მათი შესყიდის გადაწყვეტილებებზე მოქმედი ფაქტორებია: ფასი, პროდუქტის მაგარი (cool) დიზაინი, მეგობრების რეკომენდაციები, ასევე, მნიშვნელოვან როლს თამაშობს TikTok/Instagram განხილვები/ანბოქსინგები. ადრეული თინეიჯერები (12–15) ბრენდების შესახებ ინფორმაციას უმეტესად TikTok-ისა და Instagram-ის მეშვეობით იგებენ, რასაც მჭიდროდ მოსდევს მეგობრების/ოჯახის წევრებისა და ინფლუენსერების გავლენა. ბრენდებისგან მათ სურთ მხიარული, თავისუფალი, გულწრფელი და პირდაპირი კომუნიკაცია. მათთვის განსაკუთრებით მნიშვნელოვანია, კონტენტი ვიზუალურად გამოიყურებოდეს ტრენდულად და ესთეტიკურად. (აქ რაც უნდა გავითვალისწინოთ არის ის, რომ ჩვენი და მათი ესთეტიკური კონტენტის აღქმა ძალიან განსხვავდება ერთმანეთისგან და რა არის მათთვის ესთეტიკური კონტენტი, ცალკე კვლევის საგანია) მათთვის ყველაზე მიმზიდველი კონტენტია გასართობი ვიდეოები (მემები, ტრენდები) და ქუჩის სტილის ფოტოები და ვიდეოები, ასევე, სწრაფი საინფორმაციო ვიდეოკონტენტი (პროდუქტების/სერვისების ახსნა). მათი მოთხოვნა ბრენდების მიმართ არის, ბრენდი ესაუბროს გასაგებად და ინფორმაცია მიაწოდოს მარტივად.

გვიანი თინეიჯერები (16-19): პრაქტიკული და სოციალურ საკითხებში გათვითცნობიერებული

Gen Z-ის გვიანი თინეიჯერების (სკოლის მოსწავლეები და სტუდენტები) პრეფერენციებში, შესყიდვების კრიტერიუმებს ფასისა და დიზაინის გარდა, უკვე ხარისხსაც მოიცავს. მიუხედავად იმისა, რომ ისინი კვლავ ციფრულ სამყაროში არიან კონცენტრირებული, შესამჩნევი ტენდენცია ჩნდება: ბრენდების რეალურ ცხოვრებაში (ღონისძიებებზე, მაღაზიებში) ნახვისა და გამოცდის ძლიერი პრეფერენცია. რატომ? ეს შეიძლება აიხსნას ციფრული დაღლილობით, ავთენტური, ხელშესახები გამოცდილების სურვილით, ან სოციალური ინტერაქციის მოთხოვნილებით, რომელსაც ფიზიკური სივრცეები სთავაზობენ. ასევე, ოდნავ იცვლება მათი კომუნიკაციის პრეფერენციებიც, მათ გაცილებით მეტი მოთხოვნილება გააჩნიათ გულწრფელი, პირდაპირი, ავთენტური და რეალური კომუნიკაციის. ამ თაობაში წინ იწევს ბრენდის მის ღირებულებებთან შესაბამისობის (მაგ., ეკო, სოციალური პასუხისმგებლობა) ნაწილი, რაც მათში გაჩენილ სოციალურ ცნობიერებას უსვამს ხაზს, რომელიც გლობალური Gen Z ტენდენციების მსგავსია.

ახალგაზრდა ზრდასრულები (20-28): პრაგმატული და მიზანზე ორიენტირებული

ეს სეგმენტი უნივერსიტეტის სტუდენტებისა და დასაქმებული ჯენზისგან შედგება, მათი პრიორიტეტების ნაკრები თითქოს იგივეა, მაგრამ ცვლილებები მაინც არის. ფასი და ხარისხი კვლავ ფუნდამენტურია, მაგრამ გამორჩეული დიზაინი, განსხვავებული პროდუქტი, ბრენდის სახელი, და განსაკუთრებით ბრენდი. პიროვნული ბრენდების აღმოჩენის ადგილად მათთვის კვლავ ინსტაგრამი და ტიკტოკი რჩება, თუმცა ეს ჯგუფი უფრო მეტად ეყრდნობა მეგობრების/ოჯახის რეკომენდაციებს და მათთვის განსაკუთრებით მნიშვნელოვანია ფიზიკური მაღაზიების აღმოჩენა. ისინი ითხოვენ კომუნიკაციას, რომელიც არის მკაფიოდ გულწრფელი და პირდაპირი, ავთენტური, რეალური შეგრძნების მქონე. ანბოქსინგი და პროდუქტების მიმოხილვები ან ვიდეოპრეზენტაციები მათთვისაც მნიშვნელოვან კონტენტად რჩება. ამ სეგმენტისთვის ასევე მნიშვნელოვანი კონტენტია რეალური მომხმარებლების მიმოხილვები, user generated content, behind the scenes ვიდეოები. ისინი ბრენდების კომუნიკაციაში ითხოვენ რეალურ სარგებელს, მათთვის სასარგებლო კონტენტს.

კომუნიკაციის არხები: სად და როგორ ვესაუბროთ Gen Z-ს?

ბრენდების აღმოჩენის გარდა, Gen Z-ს აქვს მკაფიო პრეფერენციები, თუ სად და როგორ სურთ ბრენდებთან ურთიერთობა და ინფორმაციის მიღება. ჩვენმა კვლევამ გამოავლინა შემდეგი ძირითადი არხები, რომლებიც ყველაზე ეფექტურია ქართველ Gen Z-სთან დასაკავშირებლად:

• TikTok: ეს არის უდავოდ საუკეთესო პლატფორმა Gen Z-სთან დასაკავშირებლად, განსაკუთრებით ახალგაზრდა სეგმენტებისთვის. მოკლე ვიდეოფორმატი იდეალურია გასართობი, სწრაფი საინფორმაციო და ვირუსული კონტენტის გასაზიარებლად. მნიშვნელოვანია გავითვალისწინოთ, რომ ტიკტოკს ჯენზი გასართობად სქროლავს და იქ გაყიდვაზე ფოკუსირებული, ან მაღალ მატერიებზე მოსაუბრე ბრენდი მათთვის მოსაწყენია. ტიკტოკი მათთვის გასართობი, სალაღობო პლატფორმაა.
• Instagram: Instagram თავისი ბუნებით იდეალური პლატფორმაა ესთეტიკური ფოტოებისა და ვიდეოების, ასევე კულისებს მიღმა / რეალური მომხმარებლის მიმოხილვების გასაზიარებლად. ინსტაგრამის საშუალებით ბრენდებს შეუძლიათ შექმნან ძლიერი ვიზუალური იდენტობა.
• რეალურ ცხოვრებაში შეხების წერტილები (ღონისძიებები, მაღაზიები, flea markets, ფესტივალები): საინტერესოა, რომ კვლევის მონაწილეების მნიშვნელოვანმა ნაწილმა აღნიშნა, რომ ბრენდების შესახებ ინფორმაციის მისაღებად საუკეთესო ადგილად "რეალური ცხოვრება" მიაჩნიათ. ეს ხაზს უსვამს ფიზიკური გამოცდილებების და პირდაპირი ინტერაქციების მნიშვნელობას, როგორც ციფრული კომუნიკაციის დამატებას.
• YouTube: მიუხედავად იმისა, რომ ნაკლებად დომინანტურია, ვიდრე TikTok ან Instagram, YouTube კვლავ რჩება მნიშვნელოვან არხად, განსაკუთრებით საგანმანათლებლო კონტენტისთვის.
• მეგობრები/ოჯახი და ინფლუენსერები: მიუხედავად იმისა, რომ ეს არ არის ტრადიციული "არხები", ისინი კომუნიკაციის უმნიშვნელოვანესი წყაროებია. ბრენდებმა უნდა გაითვალისწინონ ზეპირსიტყვიერი მარკეტინგის პოტენციალი და ინფლუენსერებთან პარტნიორობა, რათა მისწვდნენ Gen Z-ს სანდო წყაროების მეშვეობით.
• სხვა არხები: Facebook და ოფლაინრეკლამები: ჯენზისთვის, შეიძლება ითქვას, რომ არარელევანტურია ეს არხები.

ბრენდებმა უნდა შეიმუშაონ მრავალარხიანი სტრატეგია, რომელიც პრიორიტეტს ანიჭებს ამ ძირითად არხებს, არგებს კონტენტს თითოეული პლატფორმისთვის და აცნობიერებს, რომ "ფიჯიტალური" გამოცდილება (ციფრული და ფიზიკური არხების შერწყმა) ხშირად ყველაზე ეფექტურია Gen Z-ისთვის.

რა აღიზიანებს ქართველ Gen Z-ს ყველაზე მეტად

იმისთვის, რომ ჯენ ზიზე მორგებული კონტენტი შევქმნათ, უნდა ვიცოდეთ, რა აღიზიანებთ მათ: ჩვენი მცირე კვლევიდან რამდენიმე მნიშვნელოვანი ინსაიტი დაიდენტიფიცირდა.

• "ქრინჯ" ფაქტორი და "ქრინჯ დეტექტორი": ყველაზე ხშირად დასახელებული გამაღიზიანებელია "ძალიან რომ ცდილობენ ტრენდულობას და ამ დროს ძალიან ქრინჯეა". Gen Z-ს განვითარებული აქვს "ქრინჯ დეტექტორი" – ეს არის მათი უნარი, მომენტალურად ამოიცნონ და უარყონ ის, რაც მათთვის ხელოვნურად, არაბუნებრივად ჟღერს/გამოიყურება. ეს არის ჯენ ზის დამოკიდებულება ბრენდების მცდელობების მიმართ, როდესაც ბრენდები ცდილობენ ტრენდების, სლენტების, მიმების ან ტენდენციების არაბუნებრივად გამოყენებას, რათა მათი კონტენტი დროული აღმოჩნდეს. არაფერი ჯენ ზის ისე არ აღიზიანებს, როგორც ყალბი მიმბაძველობა.
• ყალბი კომუნიკაცია: "ქრინჯ" ფაქტორთან მჭიდროდაა დაკავშირებული "როცა მათი კომუნიკაცია ძალიან ყალბია" – ესეც დიდი განსაცდელია ბრენდებისთვის.
• გადაჭარბებული გაყიდვებზე ორიენტირებული კონტენტი: "კომუნიკაცია ზედმეტად გაყიდვებზეა ორიენტირებული" არაერთხელ დასახელდა გამაღიზიანებლად. ეს თაობა უპირატესობას ანიჭებს ბრენდების მხრიდან ღირებულების, გართობის ან სასარგებლო ინფორმაციის მიღებას, ვიდრე თავს მოხვეულ გაყიდვების შეთავაზებებს.
• არასაკმარისი სიცხადე: ზოგიერთმა რესპონდენტმა აღნიშნა "ვერ ვხვდები მათ კონტენტს", რაც ხაზს უსვამს მკაფიო და ლაკონიური შეტყობინებების საჭიროებას.

ქეისები: გლობალური და ადგილობრივი ბრენდები, რომლებიც სწორად მოქმედებენ

გლობალური ბრენდები,რომლებიც ძალიან ახლოს არიან ქართველ ჯენზისთან:

• Nike: ქართული Gen Z-ის კვლევაში Nike ხშირად იყო დასახელებული, როგორც ბრენდი, რომელიც ეფექტურად ამყარებს კავშირს ავთენტური ამბის მოყოლით, სოციალური კამპანიებითა და გამჭვირვალე მესიჯებით. მათმა გამორჩეულმა ვიზუალურმა კონტენტმა და სოციალურ თემებთან შეხებამ განაპირობა მისი პოპულარობა ყველა ასაკობრივ სეგმენტში (12-28).
• Adidas: Adidas განსაკუთრებით პოპულარულია ახალგაზრდა თინეიჯერებისა (12-15) და ახალგაზრდა ზრდასრულების (19-22) სეგმენტში, რაც მიუთითებს მის უნარზე, შექმნას ტრენდული, ესთეტიკური და მაღალი ხარისხის პროდუქცია, რომელიც მათი ცხოვრების სტილს შეესაბამება.
• Zara & Bershka: მოდის ეს ბრენდები ხშირად დასახელდა ახალგაზრდა თინეიჯერებისა (12-15) და გვიანი თინეიჯერების (16-18) მიერ, რაც მათი ტრენდული დიზაინის, ხელმისაწვდომი ფასისა და მრავალფეროვანი ასორტიმენტის დამსახურებაა.
• Duolingo: ეს აპლიკაცია აღინიშნა ახალგაზრდა ზრდასრულების (23-28) მიერ, როგორც ბრენდი, რომელიც არის "ყოველთვის გულწრფელი და პირდაპირი, ზოგჯერ ზომიერად ირონიული და მკაცრიც, იუმორიც ტოპ დონეზე". ეს ასახავს Gen Z-ის მოთხოვნას არატრადიციულ და ჭკვიანურ კონტენტზე, რომელიც განათლებას გასართობ ფორმატში აწვდის.

ადგილობრივი ბრენდების ინსაიტები:

კვლევის მიხედვით, ძალიან ცოტა ქართული ბრენდი აკმაყოფილებს Gen Z-ის მოლოდინებს. კვლევაში მონაწილეთა აბსოლუტური უმრავლესობა ამბობს, რომ არ იცნობენ ქართულ ბრენდებს, ვერ იხსენებენ, არ აქვთ ემოციური კავშირი და ა.შ. თუმცა კვლევაში მაინც დაიდენტიფიცირდა რამდენიმე მათგანი:

• Meraki: მუდმივად სახელდება, როგორც ბრენდი, რომელიც კარგად ესაუბრება Gen Z-ს. გამოკითხვის მიხედვით, Meraki-ს გავლენა თითქმის ყველა ასაკობრივ სეგმენტში შეინიშნება. მათი წარმატება, სავარაუდოდ, ემყარება ჯენზის მიმსგავსებული ბრენდული იმიჯის შექმნას, რომელიც აერთიანებს ხელმისაწვდომ ფასს, ხარისხსა და ესთეტიკურ მიმზიდველობას, რაც Gen Z-ის ძირითად მოთხოვნებს აკმაყოფილებს. მათ შეძლეს შეექმნათ ბრენდი, რომელთანაც Gen Z-ის წარმომადგენლები "კავშირს გრძნობენ", რაც ლოიალობის ერთ-ერთი ძირითადი მამოძრავებელია.
• Reckless: Reckless ასევე ხშირად არის ნახსენები, როგორც ბრენდი, რომელიც სწორად ურთიერთობს Gen Z-სთან. ეს ბრენდი ძირითადად გვიან თინეიჯერებთან (16-18) და ახალგაზრდა ზრდასრულებთან (19-22) პოულობს გამოხმაურებას. მათი კომუნიკაციის ეფექტურობა, სავარაუდოდ, განპირობებულია ავთენტური და რეალური შეგრძნებების მიწოდებით, ასევე ტრენდული და "ჩილ" (მშვიდი, თავისუფალი) სტილით, რომელიც ამ ასაკობრივ ჯგუფებს მოსწონთ. აღსანიშნავია ისიც, რომ Reckless ფავორიტ ქართულ ბრენდად ვინც დაასახელა, აღნიშნულ რესპონდენტებს ბრენდების მხრიდან ყველაზე გამაღიზიანებელ ფაქტორად მიაჩნიათ "ყალბი კომუნიკაცია". ეს მიუთითებს, რომ ბრენდი ავთენტურია და მომხმარებლის გულებს ნამდვილობის შეგრძნებით იგებს. "რექლესის" შემთხვევაში აღსანიშნავია ისიც, რომ მომხმარებლებს საშუალება აქვთ ფიზიკურ სივრცეში, მაღაზიაში, ივენთებზე თუ სხვადასხვა შეკრების ადგილებზე გაეცნონ და კომუნიკაცია დაამყარონ ბრენდთან.

სალომე გველესიანი, რექლესის დამფუძნებელი:

"რექლესის" მთავარი იდეა თავიდანვე მარტივი იყო — გაგვეკეთებინა ბრენდი, რომლის მთავარი ღირებულება გულწრფელობა იქნებოდა. სიყალბე არის ის მთავარი სიტყვა, რომელსაც ამ თაობის ადამიანები არ გპატიობენ. მათ არ უნდათ გადაჭარბებული პათოსი, მორიგი "მთავარი მესიჯები" და ცარიელი სლოგანები. რაც გვაქვს სათქმელი, პირდაპირ ვამბობთ — ვიზუალურადაც და ვერბალურადაც.

ჩვენი მომხამრებლების უმრავლესობა Gen Z-ია — თინეიჯერებიდან დაწყებული, 20+ წლამდე ახალგაზრდებით დამთავრებული, ვინც იცის რა უნდა, რა მოსწონს და ვის ენდობა. ძალიან კონკრეტული და გარკვეულია მათი პრეფერენციები. ჩვენთვის თავიდანვე მნიშვნელოვანია იყო შეხების წერტილები: მაღაზიები, pop-up-ები, ღონისძიებები — ეს სივრცეები არა მარტო ნივთის საყიდლად, არამედ შეხვედრის, გაცნობისა და ენერგეტიკის გასაცვლელადაა.

ბიზნეს გადაწყვეტილებებიც მთლიანად ამ ფაქტორებზე დგას. საფასო პოლიტიკასაც ეს განსაზღვრავს. ბრენდის შექმნის პირველივე დღიდან ვიცოდით, რომ ხელმისაწვდომები უნდა ვყოფილიყავით for local kids. ეს საიტზეც კი დეკლარირებულია, რომ უცხოეული მყიდველებისთვის არ იყოს რაიმე უცნაური.

ჩვენმა მომხმარებლებმა სულ უნდა იცოდნენ, რომ გაყიდვა და ბიზნესი საჭიროა იმისთვის, რომ რექლესმა როგორც მათი თვითგამოხატვის პლატფორმამ - დიდხანს იარსებოს.

• Keburia: ეს ბრენდი რამდენჯერმე მოხსენიებულია, როგორც წარმატებული ქართული ბრენდი Gen Z-სთან კომუნიკაციაში. გამოკითხვის მონაცემების მიხედვით, Keburia განსაკუთრებით რეზონანსულია გვიანი თინეიჯერების (16-19) და ახალგაზრდა ზრდასრულების (19-22) სეგმენტებში. მათი წარმატება, სავარაუდოდ, ემყარება ტრენდულ და ესთეტიკურ მიდგომას, რომელიც აკმაყოფილებს ამ ასაკობრივი ჯგუფების ვიზუალურ მოთხოვნებსა და სტილის პრეფერენციებს. რესპონდენტები ხაზს უსვამენ, რომ Keburia ახერხებს იყოს ტრენდული ისე, რომ "ქრინჯი" არ იყოს, რაც ავთენტურობისადმი მათ სწრაფვას შეესაბამება.

გიორგი ქებურია: "საქართველოში ჩვენი აუდიტორიის დიდი ნაწილი Gen Z-ია. არაერთხელ ამიღნიშნავს, რომ ის აუდიტორია, რომელიც შესაძლოა ფასების გამო არ ან ვერ ყიდულობს, უბრალოდ გულშემატკივრობით ბევრად დიდი მხარდაჭერა გამოიწვიოს. 1 წელია რაც გავხსენით მაღაზია, სადაც საკმაოდ ბევრი კატეგორიის პროდუქტია წარმოდგენილი. გვინდა, რომ მომხმარებლებს შევთავაზოთ სხვადასხვა საფასო კატეგორიის პროდუქტი. ზოგადად, საზღვარგარეთ ქებურია სხვა ფასად იყიდება. როდესაც მაღაზიას ვხსნიდით, მაქსიმალურად ვეცადეთ ფასები მოგვერგო ადგილობრივ ბაზარზე, რომ ახალგაზრდებისთვის მეტად ხელმისაწვდომი ყოფილიყო. ვცდილობთ, რომ ვიყოთ მაქსიმალურად ინკლუზიურები და გვიხარია, რომ გვყავს მრავალფეროვანი და სხვადასხვა ასაკის მომხმარებელი. ვეცადეთ, რომ ჩვენი პირველი მაღაზია ყოფილიყო ვიზუალურად გამორჩეული და კონტრასტული. გამოვიყენეთ სხვადასხვა არასტანდარტული მასალა, რათა გვეთამაშა ზომებთან და სიღრმეებთან და წარმოგვეჩინა ავანგარდული ფუტურიზმის ელემენტები. შედეგად, ხშირად ჩვენს აუდიტორიას სიამოვნებს სივრცეში შემოსვლა უბრალოდ კოლექციის დასათვალიერებლად. ზოგჯერ მწერენ ახალგაზრდები, რომ მათთვის Role model ან icon ვარ (ნახევრად ხუმრობით) და ეს ჩემთვის ყველაზე დიდი მოტივაციაა." ბრენდის მხრიდან გაჟღერებული კომენტარი, სრულად ასახავს Gen Z-ის პრეფერენციებს: ბრენდის ადაპტაცია ადგილობრივ ფასებთან, ინკლუზიურობა, მაღაზიის, როგორც გამოცდილების სივრცის შექმნა (არა მხოლოდ შესყიდვისთვის), და ემოციური კავშირის დამყარება "აიქონის" სტატუსის მიღწევით.

• Zoommer: როგორც ტექნოლოგიური ბრენდისთვის, Zoommer-ისთვის Gen Z-სთან კომუნიკაცია უმნიშვნელოვანესია და აღსანიშნავია, რომ "ზუმერი" პიონერი იყო ბრენდებიდან, რომელმაც ჯენ ზიზე მორგებული კომუნიკაცია დაამკვიდრა ბაზარზე. გამოკითხვის მონაცემებით, Zoommer-ის კომუნიკაცია ყველაზე მეტად რეზონანსულია ახალგაზრდა ზრდასრულებთან (23-28).

ძირითადი დასკვნები ქართველი Gen Z-ის მიმართულებით მოქმედი ბრენდებისთვის

• ხელმისაწვდომობა და ხარისხი არ ექვემდებარება განხილვას – კონკურენტული ფასი + გამძლეობა არის მოგებიანი სტრატეგია.
  ცალკე აღნიშვნას იმსახურებს ჯენზის "სნობური" მიდრეკილება და ძვირადღირებული ნივთების სურვილი: მიუხედავად ხელმისაწვდომობისა და ხარისხის პრიორიტეტისა ყოველდღიურ შესყიდვებში, Gen Z-ს აქვს გამოხატული "სნობური" მიდრეკილება და ძლიერი სურვილი ძვირადღირებული ტანსაცმლისა და ნივთების მიმართ. მათთვის ეს არ არის მხოლოდ პროდუქტი, არამედ სტატუსის სიმბოლო, თვითგამოხატვის საშუალება და ტრენდებთან შესაბამისობა. ხშირად, ყველაზე სასურველი საჩუქრები მათთვის სწორედ ძვირადღირებული ტანსაცმელი და ტექნიკაა, რაც ასახავს მათ სწრაფვას ბრენდებისკენ, რომლებიც არა მხოლოდ ხარისხს, არამედ ესთეტიკურ მიმზიდველობასა და გარკვეულ პრესტიჟს სთავაზობენ. ეს სურვილი ერწყმის მათ "მაგარი დიზაინის/ვიზუალის" და "ყოველთვის ტრენდული/მოდური" მოთხოვნებს, რაც ხსნის, თუ რატომ იზიდავთ ზემოთ აღნიშნული ზოგიერთი ბრენდი. მათ სურთ, რომ ბრენდები ჟღერდნენ "ტრენდულად და ესთეტიკურად", რათა ასპირაციულად თვითონაც დაუკავშირდნენ ბრენდებს.
• ვიზუალურ მიმზიდველობას გადამწყვეტი მნიშვნელობა აქვს – ინვესტიცია ჩადეთ TikTok-სა და Instagram-ში ესთეტიკური, მოკლე ფორმის ვიდეოებით.
• ტრენდებზე დევნას სჯობს ავთენტურობა შეინარჩუნოთ და თქვენი ნიშა იპოვოთ – Gen Z-ს მაგიური ქრინჯ დეტექტორით, მაშინვე შეუძლია "ნაძალადევად" შექმნილი კონტენტის ამოცნობა.
• გამოიყენეთ თანატოლების გავლენა – წაახალისეთ მომხმარებლის მიერ გენერირებული კონტენტი (UGC) და ინფლუენსერების კოლაბორაციები.
• ღირებულებებზე დაფუძნებული ბრენდინგი – მდგრადობა, სოციალური პასუხისმგებლობა და ინკლუზიურობა რეზონანსულია.
• ნუ გაყიდით აგრესიულად – ინტერაქტიული კონტენტი (გამოკითხვები, გამოწვევები, კულისებს მიღმა ხედები) რეკლამებზე უკეთ მუშაობს.

დასკვნა

ეს თაობა მრავალფეროვანია, ისინი აფასებენ ავთენტურობას, ხარისხსა და ხელმისაწვდომობას. ჯენ ზი ეძებს გასართობ და საგანმანათლებლო კონტენტს, ძირითადად TikTok-სა და Instagram-ზე, თუმცა მათთვის რეალური გამოცდილებებიც მნიშვნელოვანია. იმისთვის, რომ მათთან კავშირი დაამყაროთ, იყავით გულწრფელი, მოერიდეთ "ქრინჯს" და მოარგეთ კომუნიკაცია მათ პრეფერენციებს. მოუსმინეთ და შეისწავლეთ, დააიდენტიფიცირეთ, რა საჭიროებები აქვთ და როგორ შეიძლება თქვენი ბრენდი მოარგოთ მათ საჭიროებებს. ბრენდები, რომლებიც ამ პრინციპებით მოქმედებენ, შეძლებენ Gen Z-ის ყურადღების მიპყრობას და ლოიალობის მოპოვებას.